🌿 Kur gratë fuqizohen, fuqizohet edhe komuniteti. Kur kujdesi për mjedisin bëhet pjesë e përditshmërisë, krijojmë ndryshime të qëndrueshme.

Kjo është pikërisht ideja e iniciativës “Fuqia e gjelbër e grave: Veprim lokal për ndryshim global”, e cila përmes parimeve të punës sociale të gjelbër ndërthuri ndërgjegjësimin mjedisor, shëndetin mendor dhe fuqizimin e grave nga komuniteti rom në Shuto Orizar.

Iniciativa u fokusua te një nga grupet më të cenueshme në komunitet – gratë rome, të cilat shpesh përballen me përjashtim social, qasje të kufizuar në informacione dhe ekspozim disproporcionalisht më të madh ndaj pasojave të ndotjes dhe ndryshimeve klimatike. Përmes një punëtorie edukative-informuese, pjesëmarrëset patën mundësi të diskutojnë për ndikimin e ndotjes në shëndetin e tyre fizik dhe mendor, si dhe për dukuritë e eko-ankthit dhe eko-trishtimit, të cilat gjithnjë e më shumë prekin komunitetet e cenueshme.

Por iniciativa nuk mbeti vetëm në ngritjen e vetëdijes.

Në frymën e punës sociale të gjelbër, pjesëmarrëset fituan njohuri dhe mjete praktike për të integruar zakone të qëndrueshme në jetën e përditshme. Si pjesë e aktiviteteve, u përgatitën dhe u shpërndanë sete kozmetike organike me dyllë blete, si simbol dhe shembull praktik për reduktimin e mbetjeve, përdorimin e përgjegjshëm të burimeve natyrore dhe promovimin e produkteve ekologjike.

Iniciativa tregoi se puna sociale e gjelbër nuk është vetëm një koncept, por një qasje që lidh drejtësinë sociale, shëndetin dhe mbrojtjen e mjedisit. Kur njerëzit i kuptojnë shkaqet dhe pasojat e ndryshimeve klimatike dhe u jepet mundësia të kontribuojnë aktivisht në zgjidhje, ata bëhen bartës të ndryshimeve pozitive në familjet dhe komunitetet e tyre.

Si rezultat i iniciativës, u rrit ndërgjegjësimi mjedisor i pjesëmarrëseve, u përmirësua kuptimi i ndikimit të ndryshimeve klimatike në shëndetin mendor, u nxit aktivizmi për zbatimin e praktikave të qëndrueshme dhe u forcua vetëbesimi i tyre për të iniciuar ndryshime në komunitet. Gjithashtu, u vendos bashkëpunim me SOS Fshati i Fëmijëve, i cili do të mundësojë realizimin e aktiviteteve dhe punëtorive të reja për punën sociale të gjelbër edhe në të ardhmen.

🌍 Kjo iniciativë është pjesë e projektit “ZZZ – Së bashku për avokim të gjelbër për mbrojtjen e mjedisit”, i cili tregon se ndryshimet e qëndrueshme fillojnë atëherë kur njerëzit, komuniteti dhe natyra bashkohen në një vizion të përbashkët për një të ardhme më të shëndetshme dhe më të drejtë.